ಎಪಿಎಂಸಿ ‘ಲೀಸ್-ಕಮ್-ಸೇಲ್’ ಮುಸುಕಿನಲ್ಲಿ ಭಾರಿ,ಲೂಟಿ ಲೂಟಿ. ಅವ್ಯವಹಾರ!
ಸರ್ಕಾರಿ ಆಸ್ತಿಗಳು ಖಾಸಗಿ ವ್ಯಕ್ತಿಗಳ ಜೇಬಿಗೆ.. ನಿಯಮ ಉಲ್ಲಂಘಿಸಿ ಪಾರ್ಸೆಲ್ ಸರ್ವೀಸ್ಗಳಿಗೆ ಬಾಡಿಗೆ! ಎಪಿಎಂಸಿಗೆ ಕೋಟ್ಯಂತರ ರೂಪಾಯಿ ಆದಾಯ ನಷ್ಟ!
ಬಳ್ಳಾರಿ, ಜೂನ್ (8)
ರೈತರಿಗೆ ಅನುಕೂಲ ಮಾಡಿಕೊಡಲು ಮತ್ತು ಕೃಷಿ ಉತ್ಪನ್ನಗಳ ವ್ಯಾಪಾರವನ್ನು ಉತ್ತೇಜಿಸಲು ಸರ್ಕಾರ ನೀಡಿದ ಎಪಿಎಂಸಿ (APMC) ನಿವೇಶನಗಳು ಕೆಲವು ಖಾಸಗಿ ವ್ಯಕ್ತಿಗಳ ಪಾಲಿಗೆ ಹಣ ಗಳಿಸುವ ದಾರಿಯಾಗಿ ಮಾರ್ಪಟ್ಟಿವೆ. ‘ಕರ್ನಾಟಕ ಎಪಿಎಂಸಿ ಕಾಯ್ದೆ’ಯ ಚೌಕಟ್ಟಿನಲ್ಲಿರುವ ಲೋಪದೋಷಗಳನ್ನು ಬಂಡವಾಳ ಮಾಡಿಕೊಳ್ಳುತ್ತಿರುವ ಕೆಲವು ಹಂಚಿಕೆದಾರರು, ಮಾರುಕಟ್ಟೆ ಪ್ರಾಂಗಣದಲ್ಲಿರುವ ಕೋಟ್ಯಂತರ ರೂಪಾಯಿ ಬೆಲೆಬಾಳುವ ಸರ್ಕಾರಿ ಆಸ್ತಿಗಳನ್ನು ಕಡಿಮೆ ಬೆಲೆಗೆ ತಮ್ಮದಾಗಿಸಿಕೊಂಡು, ನಂತರ ಅವುಗಳನ್ನು ನಿಯಮಬಾಹಿರವಾಗಿ ಕಮರ್ಷಿಯಲ್ ದಂಧೆಗೆ ಬಳಸಿಕೊಳ್ಳುತ್ತಿದ್ದಾರೆ. ಬಳ್ಳಾರಿ ಎಪಿಎಂಸಿ ಮಾರುಕಟ್ಟೆಯಲ್ಲಿ ಪ್ರಸ್ತುತ ನಡೆಯುತ್ತಿರುವ ಈ ‘ಬಾಡಿಗೆ ದಂಧೆ’ ಮಾರುಕಟ್ಟೆ ಸಮಿತಿಯ ಅಸ್ತಿತ್ವಕ್ಕೆ ಧಕ್ಕೆ ತರುತ್ತಿದೆ.
ಕೃಷಿ ವ್ಯಾಪಾರ ಬದಿಗಿಟ್ಟು.. ಬಾಡಿಗೆ ದಂಧೆಗೆ ಇಳಿದ ಹಂಚಿಕೆದಾರರು!
ಕೃಷಿ ಮಾರುಕಟ್ಟೆ ಪ್ರಾಂಗಣದಲ್ಲಿ ಸ್ವಂತವಾಗಿ ಮಳಿಗೆ ಅಥವಾ ಗೋದಾಮುಗಳನ್ನು ನಿರ್ಮಿಸಲು ಸಾಧ್ಯವಾಗದ ನೈಜ ವ್ಯಾಪಾರಿಗಳಿಗಾಗಿ ಸರ್ಕಾರ ‘ಲೀಸ್-ಕಮ್-ಸೇಲ್’ (Lease-cum-Sale) ಪದ್ಧತಿಯನ್ನು ಜಾರಿಗೆ ತಂದಿದೆ. ಇದರ ಪ್ರಕಾರ, ಆರಂಭದಲ್ಲಿ ನಿರ್ದಿಷ್ಟ ಅವಧಿಗೆ ನಿವೇಶನವನ್ನು ಗುತ್ತಿಗೆಗೆ (ಲೀಸ್) ನೀಡಲಾಗುತ್ತದೆ. ಆ ಅವಧಿಯೊಳಗೆ ಅಲ್ಲಿ ಮಳಿಗೆ ನಿರ್ಮಿಸಿ, ನಿರಂತರವಾಗಿ ಕೃಷಿ ವ್ಯಾಪಾರ ಮಾಡುತ್ತಾ, ಮಾರುಕಟ್ಟೆ ಶುಲ್ಕವನ್ನು ಸರಿಯಾಗಿ ಪಾವತಿಸಿದರೆ, ಗುತ್ತಿಗೆ ಅವಧಿ ಮುಗಿದ ನಂತರ ಆ ಆಸ್ತಿಯನ್ನು ‘ಅಬ್ಸಲ್ಯೂಟ್ ಸೇಲ್ ಡೀಡ್’ (ಸಂಪೂರ್ಣ ನೋಂದಣಿ) ಮೂಲಕ ವ್ಯಾಪಾರಿಯ ಹೆಸರಿಗೆ ಮಾಡಿಕೊಡಲಾಗುತ್ತದೆ.
ಆದರೆ, ಅಸಲಿ ಆಟ ಆರಂಭವಾಗುವುದೇ ಇಲ್ಲಿಂದ. ಒಮ್ಮೆ ಸೇಲ್ ಡೀಡ್ ನೋಂದಣಿ ಪೂರ್ಣಗೊಳ್ಳುತ್ತಿದ್ದಂತೆ, ಹಂಚಿಕೆದಾರರು ತಾವು ಮಾಡಬೇಕಾದ ಕೃಷಿ ವ್ಯಾಪಾರವನ್ನು ಸಂಪೂರ್ಣವಾಗಿ ನಿಲ್ಲಿಸಿ, ಕಾನೂನು ನಿಯಮಗಳನ್ನು ಗಾಳಿಗೆ ತೂರುತ್ತಿದ್ದಾರೆ. ಬಳ್ಳಾರಿ ಎಪಿಎಂಸಿಯ ಹಲವು ಪ್ರಮುಖ ಪ್ಲಾಟ್ಗಳಲ್ಲಿ ಕಟ್ಟಡಗಳನ್ನು ನಿರ್ಮಿಸಿ, ಅವುಗಳನ್ನು ಖಾಸಗಿ ಪಾರ್ಸೆಲ್ ಸರ್ವೀಸ್ಗಳಿಗೆ, ಕೊರಿಯರ್ ಕಚೇರಿಗಳಿಗೆ ಮತ್ತು ಲಾಜಿಸ್ಟಿಕ್ಸ್ ಕಂಪನಿಗಳಿಗೆ ಬಾಡಿಗೆಗೆ ನೀಡುತ್ತಿದ್ದಾರೆ. ಈ ಕಾನೂನುಬಾಹಿರ ಬಾಡಿಗೆಯ ಮೂಲಕ ಖಾಸಗಿ ವ್ಯಕ್ತಿಗಳು ತಿಂಗಳಿಗೆ ರೂ. 20,000 ದಿಂದ ರೂ. 50,000 ವರೆಗೂ ಬಾಡಿಗೆ ಹಣವನ್ನು ತಮ್ಮ ಜೇಬಿಗೆ ಇಳಿಸಿಕೊಳ್ಳುತ್ತಿದ್ದಾರೆ. ಸರ್ಕಾರಿ ಜಾಗವನ್ನು ಬಳಸಿಕೊಂಡು ಖಾಸಗಿ ವ್ಯಕ್ತಿಗಳು ಲಕ್ಷ ಲಕ್ಷ ಗಳಿಸುತ್ತಿದ್ದರೆ, ಈ ಆಸ್ತಿಗಳಿಂದ ಎಪಿಎಂಸಿಗೆ ಬರುವ ಪ್ರತ್ಯಕ್ಷ ಬಾಡಿಗೆ ಆದಾಯ ಮಾತ್ರ ಸಂಪೂರ್ಣ ‘ಶೂನ್ಯ’ವಾಗಿದೆ.
ಎಪಿಎಂಸಿಗೆ ‘ಡಬಲ್ ಲಾಸ್’.. ಕೈಕಟ್ಟಿ ಕುಳಿತ ಅಧಿಕಾರಿಗಳು!
ಈ ವ್ಯವಹಾರದಿಂದ ಮಾರುಕಟ್ಟೆ ಸಮಿತಿಗೆ ಎರಡು ರೀತಿಯಲ್ಲಿ ನಷ್ಟವಾಗುತ್ತಿದೆ. ಒಂದೆಡೆ ಬರಬೇಕಾದ ಬಾಡಿಗೆ ಆದಾಯ ಸಿಗುತ್ತಿಲ್ಲ, ಇನ್ನೊಂದೆಡೆ ಅಲ್ಲಿ ಈರುಳ್ಳಿ, ಹತ್ತಿ ಅಥವಾ ಧಾನ್ಯಗಳಂತಹ ಯಾವುದೇ ಕೃಷಿ ವಹಿವಾಟು ನಡೆಯುತ್ತಿಲ್ಲ. ಇದರಿಂದಾಗಿ ಎಪಿಎಂಸಿಗೆ ಸಿಗಬೇಕಾದ ಮಾರುಕಟ್ಟೆ ಶುಲ್ಕ (Cess) ಕೂಡ ಸಂಪೂರ್ಣವಾಗಿ ಕೈತಪ್ಪಿ ಹೋಗುತ್ತಿದೆ. ಈ ಅಕ್ರಮಗಳ ವಿರುದ್ಧ ಅಧಿಕಾರಿಗಳು ಕಠಿಣ ಕ್ರಮ ಕೈಗೊಳ್ಳಲು ಕಾನೂನಿನ ಲೋಪದೋಷಗಳೇ ಅಡ್ಡಿಯಾಗಿವೆ. ಆಸ್ತಿ ಕೇವಲ ಗುತ್ತಿಗೆಯಲ್ಲಿದ್ದಾಗ (Lease) ನಿಯಮ ಉಲ್ಲಂಘಿಸಿದರೆ ಅಧಿಕಾರಿಗಳು ತಕ್ಷಣ ನೋಂದಣಿ ರದ್ದುಪಡಿಸಬಹುದು. ಆದರೆ, ಒಮ್ಮೆ ‘ಸೇಲ್ ಡೀಡ್’ (Sale Deed) ಆದ ನಂತರ ಅದು ಕಾನೂನುಬದ್ಧವಾಗಿ ಖಾಸಗಿ ಆಸ್ತಿಯಾಗಿ ಬದಲಾಗುತ್ತದೆ.
ಅಧಿಕಾರಿಗಳು ಕ್ರಮ ಕೈಗೊಳ್ಳಲು ಮುಂದಾದರೂ, ಹಂಚಿಕೆದಾರರು ಸಿವಿಲ್ ನ್ಯಾಯಾಲಯಗಳ ಮೊರೆ ಹೋಗಿ ‘ಸ್ಟೇ ಆರ್ಡರ್’ ತರುತ್ತಿದ್ದಾರೆ. ಕೋರ್ಟ್ನಲ್ಲಿ ವರ್ಷಗಟ್ಟಲೆ ಪ್ರಕರಣ ನಡೆಯುವವರೆಗೂ ತಮ್ಮ ಬಾಡಿಗೆ ದಂಧೆಯನ್ನು ರಾಜಾರೋಷವಾಗಿ ಮುಂದುವರಿಸುತ್ತಿದ್ದಾರೆ. ನೋಂದಣಿ ಮಾಡುವ ಸಮಯದಲ್ಲೇ— “ಭವಿಷ್ಯದಲ್ಲಿ ಎಂದಾದರೂ ಈ ಜಾಗವನ್ನು ಕೃಷಿಯೇತರ ಉದ್ದೇಶಗಳಿಗೆ ಬಳಸಿದರೆ, ಈ ಸೇಲ್ ಡೀಡ್ ರದ್ದಾಗಿ ಆಸ್ತಿ ಸ್ವಯಂಚಾಲಿತವಾಗಿ ಮತ್ತೆ ಸರ್ಕಾರಕ್ಕೆ ಸೇರುತ್ತದೆ” — ಎನ್ನುವ ಕಠಿಣವಾದ ‘ರಿವರ್ಷನರೀ ಕ್ಲಾಸ್’ (Reversionary Clause) ಅನ್ನು ದಾಖಲೆಗಳಲ್ಲಿ ಸೇರಿಸದಿರುವುದೇ ಖಾಸಗಿ ವ್ಯಕ್ತಿಗಳಿಗೆ ದೊಡ್ಡ ಪ್ಲಸ್ ಪಾಯಿಂಟ್ ಆಗಿದೆ.
ಅಕ್ರಮಗಳಿಗೆ ಕಡಿವಾಣ ಬೀಳಬೇಕಿದೆ
ಬಳ್ಳಾರಿ ಎಪಿಎಂಸಿ ಮಾರುಕಟ್ಟೆಯಲ್ಲಿ ಸರ್ಕಾರಿ ಆಸ್ತಿಗಳ ದುರುಪಯೋಗಕ್ಕೆ ಕಡಿವಾಣ ಹಾಕಬೇಕಾದರೆ ತಕ್ಷಣವೇ ಉನ್ನತ ಅಧಿಕಾರಿಗಳು ಮತ್ತು ಸರ್ಕಾರ ಎಚ್ಚೆತ್ತುಕೊಳ್ಳಬೇಕಿದೆ. ಮಾರುಕಟ್ಟೆ ಪ್ರಾಂಗಣದ ಪ್ರತಿಯೊಂದು ಪ್ಲಾಟ್ ಮತ್ತು ಮಳಿಗೆಯಲ್ಲಿ ನಡೆಯುತ್ತಿರುವ ವ್ಯಾಪಾರದ ಬಗ್ಗೆ ಸಮಗ್ರ ಸಮೀಕ್ಷೆ ನಡೆಸಬೇಕಿದೆ. ನಿಯಮ ಉಲ್ಲಂಘಿಸಿ ಕಮರ್ಷಿಯಲ್ ಮತ್ತು ಪಾರ್ಸೆಲ್ ಸರ್ವೀಸ್ಗಳಿಗೆ ಬಾಡಿಗೆ ನೀಡಿರುವ ಕಟ್ಟಡಗಳ ಸೇಲ್ ಡೀಡ್ ರದ್ದುಪಡಿಸಲು ವಿಶೇಷ ಸುಗ್ರೀವಾಜ್ಞೆ ಅಥವಾ ಕಾಯ್ದೆ ತಿದ್ದುಪಡಿ ತರಬೇಕಿದೆ. ಅಕ್ರಮವಾಗಿ ಬಳಕೆಯಾಗುತ್ತಿರುವ ಕಟ್ಟಡಗಳನ್ನು ತಕ್ಷಣವೇ ಸೀಜ್ ಮಾಡಿ, ಸರ್ಕಾರದ ವಶಕ್ಕೆ ಪಡೆಯದಿದ್ದರೆ ಎಪಿಎಂಸಿ ಆಸ್ತಿಗಳು ಖಾಸಗಿ ವ್ಯಕ್ತಿಗಳ ಜಾಗೀರಾಗಿ ಬದಲಾಗುವುದರಲ್ಲಿ ಯಾವುದೇ ಸಂಶಯವಿಲ್ಲ.
